మళ్ళీ ఎందుకొచ్చావ్?!

ఏంటి.. మళ్ళీ వచ్చావ్??

ఇంక ఎప్పుడూ నా జోలికి రాను అని

చెప్పి అప్పుడెప్పుడో వెళ్ళిపోయావ్ కదా!!

మళ్ళీ ఎందుకొచ్చావ్?!

నువ్వు నన్ను వేదించిన రోజులు

నాకింకా గురుతే..

నీ వల్ల జరిగిన గాయం

ఇంక నా వంటి మీద పదిలమే!!

ఎంతో మందికి ఏడుపుని పంచావ్

అందులో నేనూ ఒకదానిని..

ఇంకా నీ వల్ల ఏడవటం

నా వల్ల కాదు..

దయచేసి వచ్చిన దారినే పో!!

నువ్వు ఇంకెప్పుడూ రావనే కదా

ఆ రోజు ధైర్యం చేసి

అందరూ కాదంటున్నా

చచ్చిపోతావ్ అని చెప్పినా

ఆపరేషన్ కి ఒప్పుకున్నాను..

మరి మళ్ళీ ఎందుకొచ్చావ్ -

చచ్చానో లెదో అని చూద్దామనా??

ప్రియమైన "నొప్పి" -

ఇంక తప్పుకో నా జీవితం నుంచి

నిన్ను భరించే ఓపిక నాకు ఇంక లేదు..